2020-2021 promozioko ikasleei agurra
Joan den ikasturtean, COVIDek erabat desegin gintuen martxoan, batere abisatu gabe. Ikasketa-bidaia hondatu zigun, eta urte hartako tutoreei ikasle talde errepikaezin batekin batera bizi behar genuen esperientzia ahaztezina lapurtu zigun.
Horren gaizki geundenez, 2019-2020 promozioko 4. mailako ikasleak oso modu traketsean agurtu genituen, edo hobeki esateko, despeditu genituen: despido-gutun batekin.
Aurten, iazko ikasturteko gure jarrera lotsagarria hobetu nahi dugu, eta beste despido-gutun bat idatzi beharrean, nahiago izan dugu zuek bakarrik aurre egin dezakezuen misio berezi batera bidali.
Hala da, urte gutxi batzuk izanen dituzue ibarretik ateratzeko, zuen ustez egokiena den horretan treba zaitezten bai batxilergoan zein Lanbide Heziketan zein unibertsitean, baina baldintza bakarrarekin: Eska ibaiaren ertzetara itzultzea, tokiko ekonomia ahula suspertu eta Erronkari Pirinioetako Kalifornia bihurtzeko enpresa handi, berritzaile eta apurtzailea sortuz.
Urte hauetan gogor lan egin beharko duzue ibarretik kanpo, eta ez da txikiagoa izanen zuen sorbaldek izanen duten erantzukizuna: Erronkaribarrari aspaldiko distira itzultzea. Dena den, ibarra berriro bizitzaz beteta ikustearen sariak eta eskola berriz neska-mutilez gainezka ikusteak dena justifikatzen dute.
Tutoreek, Gorkak eta Joxeanek, enpresa martxan jartzeko itxaroten zaituztete, eta institutuko zuzendari izanen denaren baldintzarik gabeko babesa ere baduzue. Aipatu zuzendariak Erronkaribarko hezkuntzaren alorrean egindako igoera meteorikoa zuekin joan den ikasturtean egindako lan bikainari zor baitio, eta horregatik beti izanen da zorretan zuekin.
Baina zer espero dugu zuengandik? Hau, ez gehiago, ez gutxiago.
Inhar Urzuriaga. Pertsonal-burua. Haren indarrak, bizitasunak eta lankiderik gogogabetuena ere animatzeko gaitasunak, ibarretik kanpo lortutako prestakuntzarekin eta esperientziarekin batera, gure enpresak beharko duen pertsonal-buru bihurtuko du. Agian emanen luke berak ez duela gehiegi lan eginen, baina bai eginen du, eta ziur gaude talde osoari jarriko dizkiola behar bezalako pilak.
Izaro Baines. Lan-harremanetarako arduraduna. Izaroren izaera goxo eta neurtuak, inguruko lankideekiko enpatiak eta unibertsitate-prestakuntza sendoak eragotzi eginen die Inharrek bultzatuta % 150ean lanean arituko diren langileei psikologikoki eta fisikoki haustea. Izaro izanen da enpresaren osasunaren bermea.
Ainhoa Ederra. Kalitateko zuzendaria. Enpresak sortzen dituen produktuek edo zerbitzuek merkatuaren eta bezeroen kalitate-eskakizunak betetzea Ainhoaren kontua izanen da. Urte hauetan zehar zerbait argi geratu bada, bere eskuetatik pasatzen den guztia kalitatearen eta zehaztasunaren sinonimoa dela da. Horri gehitu behar diogu urte hauetan izanen duen prestakuntza, eta beraz hor izanen dugu enpresaren bikaintasunaren ikurra.
Daniel Aineto. Berrikuntzako zuzendaria. Danielek Erronkari utzi du matematika- eta zientzia-errege gisa, bere sormenarekin (batzuetan beltz samarra) uztartzen duena. Badaki publikoak zer nahi duen eta zer behar duen. Horregatik, konfiantza dugu gure enpresak zer ekoitziko duen definitzeko: bioteknologiako ikasketak egin ondoren, gaitz guztien aurkako txertoaren sortzaileak izanen al gara? Nolanahi ere, beti lagunduko digu enpresako afarietan gure gaitzak saio komikoren batekin uxatzen.
Adrian Anaut eta Chiara Falistocco. Diseinatzaile buruak. Baina ez gara konformatuko ekoizpen sortzaile, kalitatezko eta kantitatezkoarekin. Gainera polita eginen dugu. Eta hor sartzen dira Adrian eta Chiara. Horretarako, Adrianen perfekzionismoa eta lanerako borondatea ditugu, baita Chiararekin partekatzen duen sentsibilitate handia ere. Chiarak, gainera, badu artearen eta edertasunaren zentzua eta hori ere eskainiko digu. Horrek guztiak bermatzen du edozer ekoizten dugula ere diseinurik, estetikarik eta edertasun funtzionalik onenarekin izanen dela. Eta horrek guztiak ez du esan nahi Chiarak eta Adrianek ez dutela izanen enpresatik kanpoko bizitza artistiko aberatsa. Noiznahi eskainiko dizkigute musika gaualdiak eta arte erakusketak.
Dani Hall. Chief executive officer of national and international management. Horrela ikusten dugu. Gure produktuak, kalitatearen eta diseinuaren sinonimoak, saldu egin behar dira. Dani Hallek Merkataritza eta Marketing ikasketak eginen dituenez enpresaren estrategia eta enpresak nazioartekotze-plan bat izatea ahalbidetuko du, ekoizpen guztia eskuetatik kentzeko moduko plana prestatuko digula, alegia.
Amets Gaspar. Salmentaburua. Marketing planaren diseinua funtsezkoa da, baina hori gauzatuko duen gizona beharko dugu. Amets: Institutuko hizlaririk trebeena, diplomazia eta eta dotorezia pertsonifikatzen duena. Berarekin sinatuko dira kontraturik onenak. Institutuan bere trebetasunak bakarrik somatu egin ditugu, baina hemendik kanpo garatu eta handituko dira. Merkatu zailenak bere oratoriarekin konkistatuko dira, eta kontratu mamitsu eta aberatsenek beren zigilua eramanen dute.
Egoi Zalguizuri. Konpetentzia suntsitzeko arduraduna. Zenbat enpresa erori diren merkatuaren bilakaera ez zaintzeagatik! Egoirekin hori ez zaigu gertatuko. Adimen finak, espiritu kritikoak, unibertsitateko prestakuntzak, masterrek... analista ezin hobea bihurtuko dute, enpresa lehiakideen ahulguneak antzemanen ditu inolako gupidarik gabe, eta gure antolakuntza eta produktuak hobetzeko jarraibideak emanen dizkigu. Buru pribilegiatua enpresarik onenean.
Hau esanda, Erronkaribartik ateratzeko eta Salvatierratik alde egiteko libre zarete, baina Iruñean, Zaragozan eta bizitzak eramaten zaituzten tokian ikasten jarraituko duzuena hemen geratzen garen guztioi itzultzeko.
Gu zuen zain egonen gara zuen proiektuetako ate birakariren batetik sartzen utz gaitzazuen.
Izan ezazue merezi duzuen zorte guztia!
Bihotz-bihotzez zuen irakasle ainarien partetik
iruzkinik ez:
Argitaratu iruzkina